खंबाळे ग्रामपंचायत

📜 खंबाळे गावाची माहिती :
        खंबाळे हे त्र्यंबकेश्वर तालुक्यातील, नाशिक जिल्ह्यातील एक निसर्गरम्य गाव आहे. 2011 च्या जनगणनेनुसार गावाची लोकसंख्या 1921 आहे, ज्यामध्ये पुरुष 965 व महिला 956 आहेत. गावातील एकूण कुटुंबसंख्या 344 आहे. गावाला स्वतंत्र ग्रामपंचायत कार्यालय आहे. ग्रामपंचायत कार्यकारिणीत लोकनियुक्त सरपंच सौ. सरला भाऊसाहेब भोईर व उपसरपंच ॲड. ज्ञानेश्वर काळुभाऊ मोरे कार्यरत असून, ग्रामपंचायत सदस्यसंख्या 8 (पुरुष 3, महिला 5) आहे. एकूण कार्यकारिणी 10 सदस्यांची आहे. गाव नाशिकपासून त्र्यंबकेश्वर महामार्गावर 18 किलोमीटर अंतरावर असून, त्र्यंबक नगरीच्या पूर्व दिशेला सुमारे 10 किलोमीटर आहे. गाव सह्याद्री पर्वतरांगांच्या कुशीत वसलेले असल्याने गावाचे सौंदर्य अधिकच खुलून दिसते. गावालगत ग्रामपंचायतीचा सुंदर तलाव आहे, ज्यामुळे परिसर अधिक आकर्षक झाला आहे.

🌾 शेती व पाणीपुरवठा :
        गावातील लोकांचा प्रमुख व्यवसाय शेती हा आहे. गावाचे एकूण क्षेत्रफळ 873 हेक्टर असून, बागायती क्षेत्र 37 हेक्टर, लागवडीयोग्य क्षेत्र 601 हेक्टर व इतर क्षेत्र 235 हेक्टर इतके आहे. व्यापारी दृष्ट्या गाव नाशिक बाजारपेठेच्या जवळ असल्याने शेतमालाच्या विक्रीसाठी सोयीस्कर ठरते. गावासाठी नळपाणीपुरवठा योजना असून सध्या 211 घरांना नळजोडणी केलेली आहे. जलजीवन मिशन अंतर्गत नवीन योजना मंजूर झाली असून तिचे काम प्रगतीपथावर आहे. त्यामुळे गावाला पाणीटंचाईचा त्रास होत नाही. गावाच्या उत्तरेस खंबाळे-दुडगाव हद्दीवर मोठे धरण असून त्यातून गावातील शेतकऱ्यांना शेतीसाठी पाणी उपलब्ध होते.

🌱 पर्यावरण व शैक्षणिक सुविधा :
        सन 2025 मध्ये पर्यावरण वृक्षलागवड मोहिमेत गावात दोन ते तीन हजार झाडे लावण्यात आली. त्यामुळे गाव अधिक हिरवेगार व पर्यावरणपूरक बनले आहे. गावात जिल्हा परिषदेची प्राथमिक शाळा (इयत्ता 1 ली ते 4 थी) असून ती पूर्णपणे डिजिटल आहे. तसेच गावात तीन अंगणवाड्या असून, शून्य ते सहा वर्षे वयोगटातील मुलांना पोषण आहार दिला जातो.

🏠 सोयी-सुविधा :
        गावात रेशन दुकान असून दरमहा रेशनचे वाटप केले जाते. पोस्ट ऑफिस देखील गावातच आहे. घनकचरा व्यवस्थापनासाठी घंटागाडीची सोय असून प्रत्येक घरातून ओला व सुका कचरा वेगळा गोळा केला जातो. हा कचरा स्वच्छ भारत मिशन अंतर्गत केलेल्या सेग्रीगेशन शेडमध्ये टाकला जातो. त्यामुळे गाव स्वच्छ व सुंदर राहते. गावाच्या प्रशासनिक सुविधा जवळ आहेत. पोलीस स्टेशन त्र्यंबकेश्वर येथे (८–१० किमी अंतरावर), तहसील कार्यालय त्र्यंबकेश्वर येथे, तर प्रांत कार्यालय नाशिक येथे आहे. रेल्वे स्टेशन नाशिक रोड (२५–३० किमी अंतरावर) व विमानतळ ओझर (४०–४५ किमी अंतरावर) आहे. गावाचे तलाठी कार्यालय खंबाळे येथेच आहे. "आपले सरकार सेवा केंद्र" गावातच असल्याने सर्व प्रकारच्या ऑनलाइन सुविधा व दाखले ग्रामपंचायतीतून सहज मिळतात. त्यामुळे गाव प्रशासन व नागरिक दोघांनाही सोयीस्कर सेवा उपलब्ध होतात.